വെള്ളിയാഴ്ചകളില്‍ പതിവാക്കിയിരുന്ന ശീലം അയാളാ ഒഴിവു ദിനത്തിലുമാവര്‍ത്തിച്ചു. ആഴ്ചക്കൊരിക്കല്‍ ആണ് അയാള്‍ അമ്മയുമായി സംസാരിക്കുന്നത്.
ഇവിടുന്നങ്ങോട്ട്‌ പറയുന്നത് മാത്രമേ കേള്‍ക്കുന്നുള്ളൂ.
ഹലോ ..
അമ്മേ ..
ആ ..എന്താ വിശേഷം ...
നിങ്ങളോട് ഞാന്‍ പറഞ്ഞതല്ലേ ..
ഇതെത്ര തവണ പറയണം.
സംസാരം മുന്‍പോട്ടു പോകുന്നതിനനുസരിച്ചു ശബ്ദവും വാക്കുകളും പരുഷമായിക്കൊണ്ടിരുന്നു,
ഒരു യുദ്ധം കഴിഞ്ഞെന്നോണം അല്‍പ സമയത്തിന് ശേഷം ഫോണ്‍ കട്ടായി.
അയാള്‍ ഫോണ്‍ വീണ്ടും ഡയല്‍ ചെയ്തു.
അച്ഛന്റെ തക്കുടൂ ...
എന്തെടുക്കുവാ ..
ദേഷ്യപ്പെട്ടു മാത്രം സംസാരിക്കാന്‍ അറിയുന്നയാള്‍ നിമിഷം നേരം കൊണ്ട് സ്നേഹിക്കാനും സ്നേഹത്തോടെ സംസാരിക്കാനും മാത്രമറിയുന്ന ഒരാളായി മാറിയത് കണ്ടു ഞാന്‍ അത്ഭുതപ്പെട്ടു.
അയാള്‍ കുഞ്ഞായിരുന്നപ്പോള്‍ എങ്ങിനെയൊക്കെയായിരിക്കും ആ അമ്മ അയാളെ സ്നേഹിച്ചതെന്നും കൊഞ്ചിച്ചതെന്നും വെറുതെ ഒന്നോര്‍ത്തു നോക്കി.
പത്തോ ഇരുപതോ വര്ഷം കഴിഞ്ഞാല്‍ ആ മകന്‍ എങ്ങിനെയായിരിക്കും അയാളോട് സംസാരിക്കുക എന്നും വെറുതെയൊന്നു ചിന്തിച്ചു നോക്കി.
ശേഷം ..
ഒരു ദീര്‍ഘ നിശ്വാസമെടുത്തു കൊണ്ട് ആദ്യം കണ്ട ഫേസ്ബുക്ക്‌ നോട്ടിഫിക്കേഷനിലേക്ക് മുഖം പൂഴ്ത്തി.
No comments:
Post a Comment